இதுவரை பிரதமர் மோடி கொண்டு வந்த மத்திய அரசு திட்டங்களுக்கு மட்டுமே ஸ்டிக்கர் ஓட்டிவந்த திமுக அரசு.. பிரதமர் பேசுவதை காப்பி அடித்து பேசி வருகிறார். அண்மையில் முதலமைச்சர் மு.க.ஸ்டாலின் பேசியபேச்சு அப்படியே பிரதமர் பேசியதை நகல் எடுத்து பேசியுள்ளது தான் தற்போது சமூக வலைதளைங்களில் வைரலாகி வருகிறது.
இந்தியா முழுவதும் மத்திய அரசு நேரடியாக 260க்கும் மேற்பட்ட திட்டங்களையும், 54 மத்திய உதவித்திட்டங்களையும் செயல்படுத்தி வருகிறது. கடந்த நான்கு ஆண்டுகளில் மட்டும் தமிழகத்துக்கு வரிப்பகிர்வு, மானியங்கள், உதவித்தொகைகள், சாலைகள், நெடுஞ்சாலைகள், விமான நிலையங்கள், துறைமுகங்கள், ரயில்வே உள்ளிட்ட பல துறைகளுக்காக சுமார் 6 லட்சம் கோடி ரூபாய் அளவுக்கு மத்திய அரசு நிதி வழங்கியுள்ளது. காங்கிரஸ் ஆட்சியை விட பாஜக அரசு தமிழகத்திற்கு அதிக நிதியை வழங்கியுள்ளது. இவ்வாறு மத்திய அரசுஆதரவு அளித்து வரும் நிலையில், மத்திய திட்டங்களுக்கு மாநில அரசு தொடர்ந்து தங்களது பெயரை ஒட்டி மக்களுக்கு தங்களுடைய திட்டமாகவே காட்டிக் கொள்கிறது என்ற குற்றச்சாட்டு சமூக வலைதளத்தில் பெருமளவில் பேசப்பட்டு வருகிறது.
பிரதமரின் ஆவாஸ் யோஜனாவுக்கு கலைஞரின் கனவு இல்லம், சக்தி நிவாஸுக்கு தோழி விடுதி, கிராம சதக் யோஜனாவுக்கு முதல்வரின் கிராம சாலைத் திட்டம், விஸ்வகர்மா திட்டத்திற்கு கலைஞர் கைவினைத் திட்டம் என அனைத்திலும் பெயர் மாற்றம்செய்து மத்திய அரசு உதவியுடன் தான் இந்த திட்டங்கள் செயல்பட்டு வருகிறது. ஆனால் இப்போது இந்த விவகாரம் மத்திய திட்டங்களை தாண்டி நேரடியாக பிரதமர் மோடியின் பேச்சுகளுக்கே வந்துவிட்டது என்பது புதிய பரபரப்பாக மாறியுள்ளது.
அண்மையில் மதுரையில் நடைபெற்ற முதலீட்டாளர்கள் மாநாட்டில் பங்கேற்று பேசிய முதலமைச்சர் மு.க.ஸ்டாலின், CHIP முதல் SHIP வரை முன்னேறும் தமிழ்நாடு எனப் பேசியிருந்தார். இதனை எங்கேயோ கேட்டது போல இருப்பதாகச் சந்தேகித்த சமூகவலைத்தள வாசிகள் தங்களுடைய தேடுதல் வேட்டையை தீவிரப்படுத்தியபோது கடந்த சில தினங்களுக்கு முன்பாக From chip-making to ship-making — India is building it all எனப் பிரதமர் மோடி பேசியிருப்பது தெரியவந்துள்ளது.
மத்திய அரசு என எங்கெங்கெல்லாம் இருக்கிறதோ அங்கெல்லாம் தமிழக அரசு என ஸ்டிக்கர் ஒட்டிக் கொள்வதை வழக்கமாகக் கொண்டிருக்கும் தமிழக அரசும் அதன் முதலமைச்சரும், தற்போது பிரதமரின் பேச்சையே தனது பேச்சாக ஸ்டிக்கர் ஒட்டிக்கொள்ளும் முயற்சியில் இறங்கியிருப்பதாகத் தகவல் வெளியாகியுள்ளது.
பிரதமரின் பெயரையும், முகத்தையும் தாங்கிச் செயல்படுத்தும் திட்டங்களுக்கெல்லாம் மத்திய அரசை விட மாநில அரசு தான் படியளப்பதாகக் கூறி, படையப்பா படத்தில் வரும் ”மாப்பிள்ளை அவர் தான், அவர் போட்டிருக்கும் சட்டை என்னுடையது” என விமர்சனம் செய்த முதலமைச்சர் மு.க.ஸ்டாலினுக்கு, கோவில் படத்தில் வரும் நாச்சியப்படன் கடையில் கோப்பை ஒன்றில் தன் பெயரை அச்சடிக்கும் நகைச்சுவையை சுட்டிக்காட்டி, மத்திய அரசின் திட்டங்களுக்குத் திமுகவின் பெயரை பொறித்து மக்களை ஏமாற்ற நினைப்பது இனியும் நடக்காது எனப் பாஜக தேசிய பொதுக்குழு அண்ணாமலை தக்க பதிலடி கொடுத்திருந்தார்.மக்களுக்காக மத்திய அரசு கொண்டுவரும் திட்டங்களை பின் தொடர்ந்து பல்வேறு மாநில அரசுகள் புதுப்புது திட்டங்களை கொண்டு வரும் நிலையில், தமிழக அரசோ மத்திய அரசின் திட்டங்கள் மட்டுமல்லாது பிரதமர் மோடியின் பேச்சிற்கே ஸ்டிக்கர் ஒட்டும் முயற்சியில் இறங்கியிருப்பது சமூக வலைதளங்களில் பெரும் விவாதப்பொருளாக மாறியுள்ளது.
