இந்தியாவின் நீர்நிலை மேலாண்மை மற்றும் சர்வதேச நதிநீர் ஒப்பந்தங்களில் ஏற்பட்டுள்ள அதிரடி மாற்றங்கள், அண்டை நாடான பாகிஸ்தானுக்குப் பெரும் நெருக்கடியை ஏற்படுத்தியுள்ளன. "பாகிஸ்தான் சோலி முடிந்தது" எனப் பேசப்படும் அளவிற்கு, இந்தியா தனது இயற்கை வளங்களை முழுமையாகத் தன் நாட்டுப் பயன்பாட்டிற்கு மாற்றும் நடவடிக்கையில் இறங்கியுள்ளது. பல தசாப்தங்களாகத் தடையின்றி பாகிஸ்தானுக்குச் சென்றுகொண்டிருந்த ரவி நதியின் உபரி நீர், மார்ச் 31-ஆம் தேதியுடன் முழுமையாக நிறுத்தப்பட உள்ளது.
இதற்காகப் பஞ்சாப் மற்றும் ஜம்மு காஷ்மீர் எல்லைப் பகுதியில் பிரம்மாண்டமாகக் கட்டப்பட்டு வந்த ஷாபூர் கண்டி அணைத் திட்டம் தற்போது இறுதிக்கட்டத்தை எட்டியுள்ளது. ஜம்மு காஷ்மீர் நீர்வளத்துறை அமைச்சர் ஜாவேத் அகமது ராணா இதற்கான அதிகாரப்பூர்வ அறிவிப்பை வெளியிட்டுள்ளார். மார்ச் 31-க்குள் கட்டுமானப் பணிகள் நிறைவடைந்து, ஏப்ரல் மாதம் முதல் ஒரு சொட்டுத் தண்ணீர் கூட ரவி நதியிலிருந்து பாகிஸ்தான் எல்லைக்குள் நுழையாது என்பது உறுதி செய்யப்பட்டுள்ளது.
இது பாகிஸ்தானுக்கு வழங்கப்பட்டு வரும் மிகப்பெரிய அடியாகப் பார்க்கப்படுகிறது. 1960-ஆம் ஆண்டு போடப்பட்ட சிந்து நதி நீர் ஒப்பந்தத்தின்படி, கிழக்கு நதிகளான ரவி, பியாஸ் மற்றும் சட்லெஜ் ஆகியவற்றின் மீது இந்தியாவுக்கு முழு உரிமை உண்டு. இருப்பினும், போதிய அணை வசதிகள் மற்றும் சேமிப்புத் திட்டங்கள் இல்லாத காரணத்தால், இத்தனை ஆண்டுகளாகப் பல ஆயிரம் கன அடி உபரி நீர் பாகிஸ்தானுக்கு வீணாகச் சென்று கொண்டிருந்தது. இந்த நிலைமை இனி மாறப்போகிறது. 1982-ஆம் ஆண்டிலேயே இந்திரா காந்தியால் அடிக்கல் நாட்டப்பட்ட இந்தத் திட்டம், மாநிலங்களுக்கு இடையிலான பல்வேறு சட்டச் சிக்கல்களால் முடங்கிக் கிடந்தது. ஆனால், 2018-ஆம் ஆண்டு பிரதமர் மோடி தலைமையிலான மத்திய அரசு இதில் நேரடியாகத் தலையிட்டு பணிகளை முடுக்கிவிட்டது.
பஹல்காம் மற்றும் புல்வாமா போன்ற தீவிரவாதத் தாக்குதல்களுக்குப் பிறகு, பாகிஸ்தானுடனான மென்மையான போக்கை இந்தியா முழுமையாகக் கைவிட்டது. "ரத்தமும் தண்ணீரும் ஒன்றாக ஓட முடியாது" என்ற கொள்கையின் அடிப்படையில், சிந்து நதி நீர் ஒப்பந்தத்தைச் சீரமைக்கவும், இந்தியாவிற்குச் சொந்தமான நீரை முழுமையாகப் பயன்படுத்தவும் முடிவெடுக்கப்பட்டது. ஷாபூர் கண்டி அணை பயன்பாட்டிற்கு வரும்போது, ஜம்மு காஷ்மீரின் கதுவா மற்றும் சாம்பா மாவட்டங்களில் உள்ள சுமார் 32,173 ஹெக்டேர் வறண்ட நிலங்கள் செழிப்படையும். மேலும், பஞ்சாப் மாநிலத்தின் 5,000 ஹெக்டேர் விவசாய நிலங்களுக்குப் பாசன வசதி கிடைப்பதோடு, 206 மெகாவாட் மின்சாரமும் உற்பத்தி செய்யப்படும். இது ஒருபுறமிருக்க, செனாப் நதியின் குறுக்கே நீர் மின் நிலையங்களைக் கட்டவும் மத்திய அரசு டெண்டர் விட்டுப் பணிகளைத் தொடங்கியுள்ளது. இதன் மூலம் சிந்து, செனாப் மற்றும் ரவி நதிகளின் நீர் மேலாண்மை இந்தியாவின் முழுமையான கட்டுப்பாட்டிற்குள் வரும்.
ஏற்கனவே கடுமையான பொருளாதார வீழ்ச்சியில் சிக்கித் தவிக்கும் பாகிஸ்தானுக்கு, இந்தத் நீர் நிறுத்த அறிவிப்பு பேரிடியாக அமைந்துள்ளது. விவசாயத்தை மட்டுமே நம்பியுள்ள அந்த நாட்டின் பல பகுதிகள் இதன் மூலம் பாலைவனமாகும் அபாயம் ஏற்பட்டுள்ளது. கள்ள நோட்டுப் புழக்கம் மற்றும் எல்லைத் தாண்டிய பயங்கரவாதம் மூலம் இந்தியாவைப் பலவீனப்படுத்த நினைத்த பாகிஸ்தானுக்கு, அதன் பொருளாதாரத்தின் முதுகெலும்பான விவசாயத்தை முடக்குவதன் மூலம் இந்தியா பதிலடி கொடுத்துள்ளது.
பணமதிப்பிழப்பு நடவடிக்கையைத் தொடர்ந்து, நீர் ஆதாரங்களை முறைப்படுத்துவதன் மூலம் பிரதமர் மோடி தலைமையிலான அரசு பாகிஸ்தானைச் சர்வதேச அரங்கில் நிலைகுலையச் செய்துள்ளது. நாட்டின் நலன் மற்றும் விவசாயிகளின் முன்னேற்றத்தை முன்னிறுத்தி எடுக்கப்பட்டுள்ள இந்த அதிரடி நடவடிக்கை, இந்தியப் பாதுகாப்பு மற்றும் வளர்ச்சிப் பாதையில் ஒரு மைல்கல்லாகும். இந்தியாவின் உரிமையைத் தட்டிப்பறிக்க நினைக்கும் எந்த ஒரு சக்தியும் இனி தப்ப முடியாது என்பதை இந்த அணைத் திட்டம் உலகிற்குப் பறைசாற்றுகிறது.
