2019ஆம் ஆண்டு இந்தியாவின் பாதுகாப்பு வரலாற்றில் மறக்க முடியாத ஆண்டாக அமைந்தது. அந்த ஆண்டு மார்ச் 27ஆம் தேதி “மிஷன் சக்தி” என்ற பெயரில் டிஆர்டிஓ நடத்திய செயற்கைக்கோள் எதிர்ப்பு ஏவுகணை சோதனை உலகையே திரும்பிப் பார்க்க வைத்தது. சுமார் 300 கிலோமீட்டர் உயரத்தில் புவியைச் சுற்றிக் கொண்டிருந்த இலக்கு செயற்கைக்கோளை இந்தியா துல்லியமாக தாக்கி அழித்தது. இதன் மூலம் அமெரிக்கா, ரஷ்யா, சீனா ஆகிய நாடுகளுக்குப் பிறகு செயற்கைக்கோளை விண்வெளியிலேயே தாக்கி அழிக்கும் திறன் கொண்ட நான்காவது நாடாக இந்தியா உயர்ந்தது. இது வெறும் ஏவுகணை சோதனை அல்ல; விண்வெளியில் உள்ள தனது முக்கிய சொத்துக்களை பாதுகாக்கும் வல்லமை இந்தியாவிடம் உள்ளது என்பதை உலகிற்கு அறிவித்த வரலாற்றுச் சாதனையாகும்.

அதனைத் தொடர்ந்து 2019 ஏப்ரல் மாதத்தில் மின்காந்த நுண்ணறிவு திறன் கொண்ட செயற்கைக்கோளையும் இந்தியா வெற்றிகரமாக விண்ணில் செலுத்தியது. இதன் பின்னர் நீண்ட தூர பாலிஸ்டிக் ஏவுகணைகளை வானிலேயே தடுத்து அழிக்கும் பல அடுக்கு ஏவுகணை தடுப்பு அமைப்பை உருவாக்கும் பணியில் டிஆர்டிஓ தீவிரமாக இறங்கியது. அந்த முயற்சியின் முக்கிய வெற்றியாக கடந்த ஜூன் 10 மற்றும் 11 தேதிகளில் மூன்று தொடர் இடைமறிப்பு சோதனைகள் வெற்றிகரமாக நடத்தப்பட்டன. இந்த சோதனைகளில் பயன்படுத்தப்பட்ட ஏவுகணைகள் தங்களது இலக்குகளை மிகத் துல்லியமாக தாக்கி அழித்தன. இதன் மூலம் 2,000 முதல் 5,000 கிலோமீட்டர் தூரம் வரை பாயக்கூடிய எதிரி பாலிஸ்டிக் ஏவுகணைகளை இந்தியா நடுவானிலேயே தடுத்து அழிக்கும் திறனை உறுதிப்படுத்தியுள்ளது.

இது சாதாரண பாதுகாப்பு அமைப்பு அல்ல. எதிரி ஏவுகணை ஏவப்பட்ட உடனே அதை கண்டறிந்து, அதன் பாதையை கணித்து, சில நொடிகளில் இடைமறித்து அழிக்கும் அதிநவீன ரேடார்கள், கட்டளை மையங்கள் மற்றும் இடைமறிப்பு ஏவுகணைகள் அடங்கிய பாதுகாப்புக் கவசம் ஆகும். இதன் மூலம் இந்தியாவின் முக்கிய நகரங்கள், ராணுவ தளங்கள் மற்றும் தேசிய சொத்துக்களுக்கு வலுவான பாதுகாப்பு கிடைக்கிறது.

இதுமட்டுமல்லாமல், கடற்படைக்காக உருவாக்கப்பட்ட புதிய நடுத்தர தூர கப்பல் அழிப்பு ஏவுகணையின் முதல் சோதனையையும் டிஆர்டிஓ வெற்றிகரமாக நிறைவேற்றியுள்ளது. கடல் மட்டத்திற்கு மிகக் குறைந்த உயரத்தில் பறந்து, எதிரி கப்பல்களை துல்லியமாக தாக்கும் இந்த ஏவுகணை இந்திய கடற்படையின் தாக்குதல் திறனை மேலும் வலுப்படுத்த உள்ளது.

ஒரு காலத்தில் உலக நாடுகளிடமிருந்து பாதுகாப்பு தொழில்நுட்பங்களை வாங்கிய இந்தியா, இன்று விண்வெளியில் செயற்கைக்கோளை அழிக்கும் திறனும், ஆயிரக்கணக்கான கிலோமீட்டர் தூரத்தில் இருந்து வரும் ஏவுகணைகளை நடுவானிலேயே தடுத்து அழிக்கும் வல்லமையும், கடலில் எதிரி கப்பல்களை வேட்டையாடும் அதிநவீன ஏவுகணைகளையும் உருவாக்கும் நிலைக்கு உயர்ந்துள்ளது. டிஆர்டிஓ விஞ்ஞானிகளின் இந்த சாதனைகள், இந்தியா பாதுகாப்புத் துறையில் தன்னிறைவு அடைந்து உலக வல்லரசுகளின் வரிசையில் உறுதியாக முன்னேறி வருவதை மீண்டும் ஒருமுறை நிரூபித்துள்ளன.