தேசிய கல்விக் கொள்கைக்கு எதிராகக் கடுமையான விமர்சனங்களை முன்வைத்து வந்த கேரள அரசு, மத்திய நிதியை உறுதி செய்வதற்காக PM SHRI திட்டத்தில் இணைய முடிவு செய்துள்ளது. அதே நேரத்தில், தமிழக அரசு தொடர்ந்துஇந்தத் திட்டத்தில் சேராமல் அடம்பிடித்துவருவதாகக் குற்றச்சாட்டு எழுந்துள்ளது.
மேலும் கேரள அரசு PM SHRI திட்டத்தில் இணைய முடிவெடுத்துள்ள நிலையில், இது தொடர்பாக எழுந்த சர்ச்சைகளுக்கு கேரள கல்வித்துறை அமைச்சர் வி.சிவன்குட்டி விளக்கமளித்துள்ளார். இது தொடர்பாக பேசிய அவர், மாணவர்களின் நலன் கருதி மாநிலத்திற்குரிய சமக்ர சிக்ஷா அபியான் நிதியை பெறுவதற்காக இந்த நடைமுறையை மேற்கொள்ளவிருப்பதாக தெரிவித்துள்ளார்.
மேலும், மாணவர்களுக்கு கிடைக்கும் நன்மைகளை தடுக்கக் கூடாது என தெரிவித்த அவர், வேளாண்மை, சுகாதாரம், உயர் கல்வி ஆகிய துறைகளின் வரிசையில், பள்ளி கல்வித் துறையும் இனி மத்திய திட்டங்களின் பலன்களை அனுபவிக்கப்போவதாக தெரிவித்தார்.
தேசிய கல்விக் கொள்கை 2020 என்பது இந்தியாவின் கல்வி துறையில் மிகப் பெரிய மாற்றத்தைக் கொண்டுவரும் ஒரு முக்கியமான கொள்கையாகும். சுமார் 34 ஆண்டுகளுக்குப் பிறகு, 2020ஆம் ஆண்டில் புதிய கல்விக் கொள்கை கொண்டு வரப்பட்டது. இதன் முக்கிய நோக்கம், குழந்தைகள் முதல் கல்லூரி மாணவர்கள் வரை அனைவருக்கும் தரமான கல்வி வழங்குவது, திறன் வளர்ச்சியை ஊக்குவிப்பது, மற்றும் இந்தியாவின் கல்வி அமைப்பை உலகத் தரத்துக்கு உயர்த்துவதாகும்.
தேசிய கல்விக் கொள்கையின் முக்கிய நோக்கம், “மனப்பாடக் கல்வி” என்ற பழைய முறையைத் தகர்த்து, “புரிந்துகொண்டு கற்றல்” என்ற புதிய வழியை அறிமுகப்படுத்துவதாகும். மாணவர்கள் புத்தகங்களில் உள்ளதை வெறுமனே நினைத்து எழுதுவதைவிட, அந்தப் பாடங்களை நிஜ வாழ்க்கை அனுபவங்களுடன் இணைத்து புரிந்துகொள்வதற்கு முக்கியத்துவம் அளிக்கப்படுகிறது. இதனால் மாணவர்கள் சிந்தனை திறன், ஆராய்ச்சி திறன் மற்றும் பிரச்சனை தீர்க்கும் திறன்களை வளர்த்துக்கொள்வார்கள்.
புதிய கல்விக் கொள்கை இந்தியாவின் அனைத்து மொழிகளுக்கும் சம மதிப்பை அளிக்கிறது. குறிப்பாக, தாய்மொழியில் ஆரம்பக் கல்வியை வழங்குவது இக்கொள்கையின் முக்கிய அம்சமாகும். குழந்தைகள் தங்கள் தாய்மொழியில் படிக்கும் போது கல்வி எளிதாகவும், ஆர்வமூட்டுமாகவும் இருக்கும் என்பதே இதன் அடிப்படை நோக்கம். அதே நேரத்தில் ஆங்கிலம் மற்றும் பிற மொழிகளும் கற்றல் முறையின் ஒரு பகுதியாக சேர்க்கப்பட்டுள்ளன.
மேலும், தேசிய கல்விக் கொள்கை தொழில்நுட்பம் சார்ந்த கற்றலுக்கு பெரும் முக்கியத்துவம் அளிக்கிறது. எதிர்காலத்தில் வேலை வாய்ப்புகள் தொழில்நுட்ப அறிவை அடிப்படையாகக் கொண்டிருக்கும் என்பதால், ஒவ்வொரு மாணவரும் கணினி அறிவியல், செயற்கை நுண்ணறிவு, ரோபோடிக்ஸ் போன்ற துறைகளில் அடிப்படை அறிவைப் பெற வேண்டும் என வலியுறுத்தப்படுகிறது. இதனுடன், பள்ளி மற்றும் கல்லூரிகளில் ஆன்லைன் கற்றல், டிஜிட்டல் பாடநெறிகள், மற்றும் மெய்நிகர் வகுப்புகள் போன்ற வசதிகளும் வழங்கப்பட வேண்டும் என திட்டமிடப்பட்டுள்ளது.
தேசிய கல்விக் கொள்கை, இந்தியாவில் கல்வி ஒரே மாதிரியாக இருக்க வேண்டும் என்பதற்காக மாநிலங்களுக்கு ஒரு அடிப்படை வழிகாட்டுதலை வழங்குகிறது. ஆனால் அதே நேரத்தில், ஒவ்வொரு மாநிலமும் தங்களது கலாச்சாரம், மொழி, பிராந்திய தேவைகள் போன்றவற்றை கருத்தில் கொண்டு, தங்கள் பாடத்திட்டங்களை மாற்றிக் கொள்ளும் சுதந்திரத்தையும் பெறுகின்றன. இதனால், ஒவ்வொரு மாநிலத்துக்கும் தனித்தன்மை காக்கப்பட்டு, ஒரே நேரத்தில் நாட்டின் கல்வி தரமும் உயர்த்தப்படுகிறது.
மேலும், இந்தக் கொள்கை கல்வியை அனைவருக்கும் சமமாகப் பகிரும் நோக்கத்தையும் கொண்டுள்ளது. நகரம், கிராமம், ஏழை, பணக்காரர் என்ற வேறுபாடின்றி, ஒவ்வொரு குழந்தைக்கும் தரமான கல்வி கிடைக்க வேண்டும் என்பதே அதன் அடிப்படை சிந்தனை.
